ဘ၀ လက်တွဲဖော်

မချစ်လေပြေက ကျွန်မကို လက်တွဲဖော် အကြောင်းရေးဖို့ တက်ဂ်ထားတာကြာပြီ။ ဒါပေမဲ့ ကျွန်မက ဘာရေးရမှန်းမသိလို့ ခုမှ ရေးဖြစ်တာ။ မလေပြေက အွန်လိုင်းလည်း မတက်၊ သူ့ဘလော့ဂ်ကိုလည်း ပိတ်ထားတော့ ဘယ်လိုရေးထားမှန်း မသိရ ဖြစ်နေရာက နောက်ဆုံး ဖုန်းနဲ့ မက်ဆေ့ခ်ျပို့ပြီး လှမ်းမေးလိုက်ရတော့တယ်။ အဲဒါနဲ့ ကိုစိုးထက်၊ မနုစံ၊ မလေးမ စတဲ့ ဘလော့ဂါတွေရဲ့ ပို့စ်တွေ ဖတ်ပြီးသကာလ ကိုယ်ရေးချင်တာ ကောက်ရေးမိပါတယ်။


ဘ၀လက်တွဲဖော်ဆိုတာကို ဘယ်လို စိတ်ကူးနဲ့ စဉ်းစား ရွေးချယ်မလဲဆိုတာ တော်တော် ဖြေရခက်တယ်။ ဘာလို့လဲဆိုတော့ ဘယ်တုန်းကမှ သေချာ မစဉ်းစားမိလို့ပဲ။ ဒါပေမဲ့ ကိုယ့်ချစ်သူက ဘယ်လိုမျိုး ဖြစ်ရမယ်ဆိုတာမျိုးတော့ ၁၉၊ ၂၀ အရွယ်တုန်းက တွေးမိတာလေးတွေ ရှိတယ်။ ခပ်ငယ်ငယ် အရွယ်က အတွေးတွေဆိုတော့ (ကျွန်မအတွက် ခုချိန်ထိ သိပ်မပြောင်းလဲသေးပေမဲ့) သူများတွေအတွက် ရယ်စရာ ဖြစ်နေမလားပဲ။

အမှတ်စဉ်ထိုးပြီး ကျွန်မ ချရေးထားပေမဲ့ အားလုံးဟာ တပြေးညီထဲ ကျွန်မ တန်ဖိုးထားတဲ့အရာတွေပဲ ဖြစ်ပါတယ်။ အမှတ်စဉ် ၁ က အရေးအကြီးဆုံး မဟုတ်သလို အမှတ်စဉ် ၉ ကလည်း အရေးသိပ်မပါတာမျိုး မဟုတ်ပါဘူး။

၁။ ကျွန်မ ချစ်သူက လက်ရေး လှရမယ်။
ကျွန်မ ကိုယ်တိုင်က လက်ရေးမလှပေမဲ့ ကျွန်မချစ်သူ/ဘ၀ လက်တွဲဖော် ကိုတော့ လက်ရေးလှတဲ့သူပဲ ဖြစ်စေချင်ပါတယ်။ ကိုယ့်ချစ်သူစာလေး ဖတ်ပြီး ကြည်နူးရမဲ့အစား လက်ရေးစုတ်နဲ့စာတွေကို မနည်း လိုက်ဖတ်နေရမယ်ဆိုရင် မနိပ်သေးဘူးလို့ တွေးမိပါတယ်။ ဘာပဲဖြစ်ဖြစ် ကျွန်မ ကံကောင်းပါတယ်။ လက်ရေးလှတဲ့သူတွေနဲ့ပဲ တွေ့ရလို့။ သူကလည်း လက်ရေး အရမ်းလှတယ်။ နောက် ကြုံမှ သူ့လက်ရေးကို စကန်ဖတ်ပြီး ကြွားတော့မယ် သိလား။ :P

၂။ စာလုံးပေါင်း မှန်တဲ့သူပဲ ဖြစ်ရမယ်။
ဟိ... ဒါလေးကိုတော့ ခု ခြွင်းချက် ထားလိုက်ပြီ။ ဘာလို့ဆို ကျွန်မကိုယ်တိုင်ကိုက တချို့ စာလုံးတွေ ဘယ်လို ပေါင်းရမှန်း မသိတော့ဘူး။ တခါတလေ -ျ နဲ့လား၊ြ- နဲ့လား၊ -တ်နဲ့လား၊ -ပ်နဲ့လား စသဖြင့် မသေချာ၊ မရေရာ ဇဝေဇ၀ါ ဖြစ်လာတာတွေ များတဲ့အခါ သူ စာလုံးပေါင်း နည်းနည်း မှားတတ်တာကို ခွင့်လွှတ်လိုက်ပါတယ်။ အရင်တုန်းကလိုသာဆို ဘယ်ရလိမ့်မလဲ။ စာလုံးပေါင်းမှားတဲ့သူဆို ဘယ်လိုမှ အထင်ကြီးလို့ကို မရတာ။

၃။ ဂစ်တာ တီးတတ်ရမယ်။
ကျွန်မက Guitar ကို တော်တော် crazy ဖြစ်တယ်။ ဂစ်တာသံကြားလိုက်ရင် ဘယ်လို၊ ဘယ်လို သဘောကျမှန်း မသိဘူး။ တီးဝိုင်းက မြိုင်ဆိုင်တဲ့ သံစုံထက် ဂစ်တာသံကို ပိုနှစ်ခြိုက်ပါတယ်။ ကျွန်မကိုယ်တိုင်လည်း ဂစ်တာ အရမ်းတီးတတ်ချင်တယ်။ တလလောက်တော့ ဂစ်တာတီး နည်းနည်း သင်ဖူးပေမဲ့ ကျွန်မ Profile မှာ ရေးထားသလိုပဲ ကျွန်မက ဆန္ဒသာရှိပြီး ဖြစ်မြောက်အောင် မကြိုးစားဖြစ်ဘူး။ အကြောင်း အကျိုး မညီညွတ်သေးလို့လည်း ပါမှာပေါ့လေ။ ကျွန်မ ကံမကောင်းတာ တချက်ကတော့ သူက ဂစ်တာကို ဟုတ်တိပတ်တိ မတီးတတ်ပါဘူး။ ကျွန်မထက် သာတယ်ပြောလို့ရတဲ့ ဒေါင်ဒင်၊ ဒေါင်ဒင်လောက်ပဲ တီးတတ်တယ်။ နည်းနည်းလေး ကျင့်လိုက်ရင်တော့ သူ ကောင်းကောင်း တီးတတ်သွားမှာပါ။ ခုလောလောဆယ်တော့ သူ တီးတတ်တဲ့ တပုဒ်တည်းသော သီချင်းလေးကိုပဲ ကျွန်မ အမြဲ နားထောင်နေရပါတယ်။

၎။ ပညာတတ်ရမယ်။
ကျွန်မ အဖေက ပြောတယ်။ ပညာတတ်အောင် စာတွေ သင်ပေးတယ် ဆိုတာ ကိုယ့်ဟာကိုယ် အမှား၊ အမှန် ဝေဖန် ပိုင်းခြားနိုင်အောင်လို့တဲ့။ ပိုက်ဆံက အဓိက မဟုတ်ဘူး။ ပညာတတ်တစ်ယောက် အသိဥာဏ်မျိုးရဖို့ ငွေပေးလို့မရဘူးတဲ့။ ပညာတတ်ရင် ပိုက်ဆံရှာရ လွယ်ပါတယ် လို့လည်း ပြောတတ်တယ်။ ဘာပဲဖြစ်ဖြစ်ပါ ငွေကြေးချမ်းသာပြီး ပညာမရှိတဲ့လူမျိုးနဲ့တော့ ကျွန်မ မတွေ့မှာ သေချာပါတယ်။ အဲလိုလူမျိုး အထင်သေးတတ်လွန်းလို့။

၅။ ဥာဏ်ကောင်း၊ စာတော်ရပါမယ်။
ဒါက ငယ်ငယ်က တွေးထားတာဆိုတော့ တော်တော်လေးတော့ ကလေးဆန်နေမလားပဲ။ ကျွန်မက စာမတော်၊ စာမကြိုးစားတဲ့သူဆို အပေါင်းအသင်းတောင် လုပ်ချင်တာ မဟုတ်ဘူးရယ်။ ခုတော့ အဲလောက်လည်း မဟုတ်တော့ပါဘူး။ ကိုယ်တိုင်ကလည်း အပျင်းကြီးပြီး စာ သိပ်မလုပ်ချင်တော့တာလည်း ပါမှာပေါ့။:P ဒါပေမဲ့ ကျွန်မ ကြိုးစားချင်စိတ်ရှိရင်တော့ ဘယ်သူ့ကိုမဆို အေးဆေးယှဉ်နိုင်တယ်လို့ ကိုယ့်ကိုယ်ကို ယုံကြည်ထားပါတယ်။:D ဘာပဲဖြစ်ဖြစ် ယောက်ျားလေး အများစုက ဥာဏ်ကောင်းကြတဲ့သူ များပါတယ်။ သူသည်လည်း တစ်ယောက်အပါအ၀င်ပေါ့။

၆။ အရပ်ပုတဲ့သူ မဖြစ်ရဘူး။
ကျွန်မက အရပ် ၅ ပေ ကျော်ကျော်သာ ရှိသော်လည်း ကိုယ့်ချစ်သူကိုတော့ ဘယ်နည်းနဲ့မှ အရပ်ပုတဲ့သူ မဖြစ်စေချင်ပါဘူး။ ၅ ပေ ၆ လောက်ဆိုရင်တောင် ပုတယ်လို့ ယူဆတဲ့အတွက် အနည်းဆုံး ၅ ပေ ၇ လက်မ ရှိရမယ်လို့ သတ်မှတ်ထားပါတယ်။ ကံကောင်းစွာပဲ ကျွန်မရဲ့ အခင်ဆုံး သူငယ်ချင်းတွေထဲမှာတောင် အရပ်ပုတဲ့သူ မပါပါဘူး။ အရပ် ၅ ပေ ၈ ကနေ ၆ ပေ ထိ ရှိကြတဲ့ သူတွေကြီးပဲ ဖြစ်ပါတယ်။ သူက ၅ ပေ ၈ နဲ့ ကပ်သီးလေး လွတ်သွားပါတယ်။ ;)

၇။ ရုပ်ရည်ကတော့ အဓိက မဟုတ်ဘူး။ စိတ်ဓာတ်ကောင်းဖို့ပဲ လိုပါတယ်။
ရုပ်ချောခြင်း၊ ရုပ်ဆိုးခြင်းက ကျွန်မကို ဘယ်လိုမှ မလွှမ်းမိုးနိုင်ပါဘူး။ ယောက်ျားတစ်ယောက်မှာ ရှိသင့်တဲ့ စိတ်ဓာတ်ကသာ အရေးကြီးဆုံးဖြစ်ပါတယ်။ ဘ၀င်မြင့်၊ ကြွားဝါ၊ လေကြီးမိုးကြီး ပြောတတ်သော ယောက်ျားများကို အရမ်းမုန်းပါတယ်။ ရုပ်ချောချော မင်းသားတွေ၊ ကောင်လေးတွေကို ကြည့်ပြီး စိတ်ကူးမယဉ်တတ်တာ ငယ်ငယ်တုန်းထဲကပါပဲ။ အဲလို ပြောတဲ့အတွက် သူ့ကို မချောဘူး မထင်ကြနဲ့နော်။ သူက အရမ်းချစ်ဖို့ကောင်းတာ။ မယုံ အန်တီငြိမ်းကို မေးကြည့်။:P


၈။ ကိုယ်က ချစ်တဲ့သူ ဖြစ်ရမယ်။ ကိုယ့်ကိုလည်း ချစ်တဲ့သူ ဖြစ်ရမယ်။
ဒါက အရေးကြီးတယ်လေ။ ကျွန်မ မချစ်တဲ့သူတော့ ဦးနှောက်နဲ့ စဉ်းစားပြီး ရွေးချယ်တယ်ဆိုတာမျိုး ဘယ်တော့မှ မဖြစ်နိုင်။ တချို့က ပြောကြတယ်။ ကိုယ်ချစ်ကို မရှာနဲ့၊ သူချစ်ကိုရှာတဲ့။ ကျွန်မကတော့ အဲဒီအဆိုကို လုံးဝ မထောက်ခံပါဘူး။ ကိုယ်ချစ်တဲ့သူကပဲ ကိုယ့်ကို စိတ်ချမ်းသာမှု ပေးနိုင်မှာလေ။ ကိုယ်မချစ်တဲ့သူက စိတ်ဒုက္ခ လာပေးတာထက် ကိုယ်ချစ်တဲ့သူက စိတ်ဒုက္ခပေးတာကို ပို သည်းခံနိုင်မယ် ထင်ပါရဲ့။ သေချာတာက ကျွန်မ အချစ်ကို မကိုးကွယ်ပါဘူး။ ဒါပေမဲ့ မရှိမဖြစ်လို့ သတ်မှတ်ထားတယ်။

၉။ ကျွန်မထက် အသက် ၁နှစ် ကြီး၊ ၁ နှစ် ငယ်၊ ရွယ်တူပဲ ဖြစ်ရမယ်။
ကျွန်မက ကိုယ့်ထက် အသက်အများကြီး ကြီးတာကို သဘောမကျပါဘူး။ ကိုယ့်ကို ဆရာလုပ်မှာစိုးလို့ရယ်၊ ဘာကြောင့်မှန်းမသိ ကြိုက်လို့မရတာကြောင့်ရယ်ပါ။ မိန်းကလေး အတော်များများ ကိုယ့်ထက် အသက် ငယ်သူကို မကြိုက်ကြပါဘူး။ နှစ်ကုန်ပိုင်းလောက်မှာ မွေးတဲ့ကျွန်မကို အမေက ကျောင်းစောထားချင်ပေမဲ့ (ဦးနှောက်ဖွံ့ဖြိုးမှုအတိုင်း စာစသင်ဖို့ သတ်မှတ်ထားတဲ့ အသက်အရွယ်မှသာ) စာသင်ရမယ့်အရွယ်မှသာ စာသင်စေချင်တဲ့ အဖေက နောက်ကျပြီး ထားလည်း ဘာမှမဖြစ်ဘူးလို့ ဆိုပါတယ်။ ဒီတော့ ၅ နှစ်ခွဲမှာမှ ကျောင်းစနေရတဲ့ ကျွန်မနဲ့ ၄ နှစ်နဲ့ ကျောင်းစောတက်တဲ့သူ အသက် ၁ နှစ်ခွဲ ကွာကြသော်လည်း အတန်းတူတဲ့အတွက် ရွယ်တူလို့ သဘောထားပါတယ်။:P ကျွန်မက ဆရာကြီး လုပ်ချင်တဲ့အခါ "ငါက နင့်ထက် လူအရင် စောဖြစ်တာ။ လျှာမရှည်နဲ့။"လို့ ပြောတတ်ပြီး တခါတခါ ကျွန်မကို အနိုင်မပေးရင်တော့ "အမယ်... အသက်လေး ၁ နှစ်ကျော်လောက် ကွာတာနဲ့များ သူက ငါ့ကို အလျှော့ပေးစေချင်သေးတယ်။ လာလုပ်မနေနဲ့။ မရဘူး။"လို့ ပြောရတာ အရမ်းကို အရသာ ရှိလှပါတယ်။;))

၁၀။ လူမျိုးတူ၊ ဘာသာတူပဲ ဖြစ်ရပါမယ်။
လူမျိုးတူ ဆိုတဲ့ နေရာမှာ ကချင်၊ ကယား၊ ကရင်၊ ချင်း၊ မွန်၊ ဗမာ၊ ရခိုင်၊ ရှမ်း စတဲ့ မြန်မာတိုင်းရင်းသား အားလုံးကို ကျွန်မနဲ့ လူမျိုးတူလို့ ယူဆပါတယ်။ ဘာသာကတော့ အားလုံးသိကြတဲ့အတိုင်း ဗုဒ္ဓဘာသာပေါ့။

၁၁။ ကိုယ့်မိဘတွေအပေါ် လေးလေးစားစား ဆက်ဆံတတ်တဲ့သူ ဖြစ်ရမယ်။
သူကတော့ သူ့မိဘတွေကို ချစ်ခင်တတ်ရုံတင်မက၊ ကျွန်မကိုလည်း "မိဘတွေကို စိတ်မဆိုးရဘူးနော်။ စိတ်ဆင်းရဲအောင် မလုပ်ရဘူးနော်။ ဘာမှ သွားမပြောရဘူးနော်"လို့ တတွတ်တွတ် မှာတတ်တဲ့သူ ဖြစ်တဲ့အတွက် ကျွန်မ ကံကောင်းတယ် ဆိုရပါမယ်။

၁၂။ အလောင်းအစားကတော့ မလုပ်လေ ကောင်းလေပါပဲ။ အရက်၊ ဆေးလိပ်ကတော့ အလွန်အကျွံမဟုတ်ရင် ရပါပြီ။ ဆေးလိပ်နံ့မခံနိုင်တဲ့အတွက် ကိုယ့်အနားမှာ လာမသောက်ရင် ပြီးတာပဲ။ အရက်သမားကိုတော့ ဘယ်နည်းနဲ့မှ မချစ်ခင်နိုင်ပါ။ မကောင်းတဲ့သူကို ကိုယ့်လက်ထဲရောက်မှ ပြုပြင်မယ်ဆိုတဲ့ သူရဲကောင်းဆန်ဆန် ပေါတောတော အတွေးမျိုးတော့ ဘယ်တုန်းကမှ မရှိခဲ့ဘူး။ လူတစ်ယောက်ရဲ့ စိတ်ဓာတ်ဗီဇကို ပြုပြင်ပြောင်းလဲဖို့ တော်တော် မလွယ်ကူဘူးဆိုတာ သိလို့ပါ။

၁၃။ ယောက်ျားပဲဖြစ်ဖြစ်၊ မိန်းမပဲဖြစ်ဖြစ် အသိဥာဏ်ရှိတဲ့ လူလို့ ကိုယ့်ကိုယ်ကို သတ်မှတ်ထားရင် စောင့်ထိန်း၊ ကျင့်သုံးသင့်တဲ့ ကိုယ်ကျင့်တရားဆိုတာ ရှိပါတယ်။ အိမ်ထောင်ဘက် လက်တွဲဖော်ဆိုတာ ကိုယ့်အတွက်တင်မဟုတ်၊ ကိုယ့်ရဲ့မျိုးဆက် သားသမီးတွေအတွက်ပါ အရေးကြီးတဲ့သူ ဖြစ်လေတော့ မိသားစုကို ခင်တွယ်တဲ့သူ၊ မိသားစုအပေါ် မဖောက်ပြန်ဘဲ သစ္စာရှိတဲ့သူ ဖြစ်ဖို့လည်း လိုအပ်သေးတာပေါ့။ အဲဒါနဲ့ ပတ်သက်ပြီး ကျွန်မရဲ့ သဘောထားကို မိန်းကလေးများနှင့် ရွေးချယ်ခွင့် ဆိုတဲ့ ပို့စ်မှာ ရေးခဲ့ဖူးပါတယ်။

တကယ်တော့ မိန်းကလေး တစ်ယောက်အတွက် အရေးကြီးလှတဲ့ လက်တွဲဖော်ကို ရွေးချယ်တာ ဒီထက်မက လိုအပ်တာတွေ ရှိဦးမှာပါ။ အချိန်မရတော့တဲ့အတွက် ဒီလောက်ပဲ ရေးလိုက်တော့မယ်။

နောက်ထပ် ကျွန်မ တက်ဂ်မယ့်သူတွေက ထုံးစံအတိုင်း :D

အန်တီငြိမ်း
အန်တီခင်
မပန်
ပြည့်စုံ
မင်းမင်း
လင်းလက်
ဝင်္ကပါ


ရွှင်လန်း ချမ်းမြေ့ကြပါစေ။

s0wha1

Print this post