Wednesday, March 12, 2008

တံတားနီ အမှတ်တရ



နှစ်၂၀ပြည့် တံတားနီအထိမ်းအမှတ်အဖြစ် ရေးထားတဲ့
မမေမင်းဆက်ရဲ့ကဗျာလေးကို အီးမေးလ်ကနေ ကိုမင်းသစ်တည်က ပေးပို့ခဲ့ပါတယ်။

***** *** *****


တံတားနီ အမှတ်တရ

လွန်ခဲ့တဲ့နှစ် ၂၀ ... နွေရာသီ မတ်လအလယ်မှာ
ဒီနေရာ၊ ဒီတံတားဟာ သွေးစွန်းခဲ့တယ်။

လက်နက်မပါ လက်ဗလာနဲ့
ကျောင်းသူကျောင်းသား လူငယ်များကို
လုံထိန်းတွေ ရှေ့နောက် ပိတ်ကာဝိုင်းလို့
သေရိုက်နှက်ကြတယ်။

ကျောင်းသူအပျို ကလေးမငယ်လေးတွေကို
တဏှာရူးတဲ့ လုံထိန်းတွေက
ကားပေါ်ဆွဲတင် အမှောင်တိုက်သွင်းလို့
ခွေးဇာတ်ခင်းတာ ခံခဲ့ကြရတယ်။

ကျောင်းသားလူငယ် ယောက်ျားငယ်များ
ဦးနှောက်ထွက်၊ မှောက်ခုံလဲလို့
သွေးသံရဲရဲနဲ့ သေပွဲဝင်ခဲ့ကြရတယ်။

ပိုင်ရှင်မဲ့နေတဲ့ ကျောင်းသားကတ်တွေ၊
သွေးစွန်းနေတဲ့ စာအုပ်တွေ၊
ဖိနပ်တွေ၊ လွယ်အိတ်တွေ…
ဟိုမှာတစ… ဒီမှာတစနဲ့ ပြန့်ကာကြဲလို့
မြင်မကောင်းအောင် ဖြစ်ခဲ့ရတာ။

ဒီနေရာ ဒီတံတားဟာ သွေးမခြောက်သေးပါ။
မြက်ခင်းအောက်မှာ၊ သွေးတွေရှိသေးတယ်။
တံတားပေါ်က ခုံတွေကို ခေါက်ကြည့်ရင်
ငိုသံ၊ ညည်းသံ၊ အော်ဟစ်သံတွေ ကြားရအုံးမယ်။

မမြင်ဘူး၊ မတွေ့ဘူး၊ မမီလိုက်တဲ့ လူငယ်များ
အင်းလျားကို လျှောက်သွားတဲ့အခါ
မင်းတို့ ခြေထောက်အောက်မှာ
ကျောင်းသားကျောင်းသူတွေသွေး
စေးထန်းနေတာ သတိရပါ။

မြင်ဘူး၊ တွေ့ဘူး၊ ကြုံဘူးခဲ့သူ လူလတ်များ
အသက်ပေးခဲ့ကြရသူတွေ၊ အရှက်စတေးခဲ့ရသူတွေကို
မင်း မေ့ထားလိုက်တော့မှာလား။

တမလွန်မှာ... စိတ်မအေးနိုင်ဘဲ ရှိနေသေးတဲ့ ၀ိညာဉ်များ
လက်စားချေနိုင်ဘို့အရေး
လာကူပေးလှည့်ကြပါ။

လွန်ခဲ့တဲ့နှစ်၂၀... နွေရာသီ မတ်လအလယ်မှာ
ဒီနေရာ ဒီတံတားဟာ
သွေးစွန်းခဲ့တယ်။


မေမင်းဆက်

***** *** *****

ဒီကဗျာကို ကျွန်မဘလော့ဂ်မှာ တင်ခွင့်ရတဲ့အတွက် မမေမင်းဆက်နဲ့ ကိုမင်းသစ်တည်ကို ကျေးဇူးတင်ပါတယ်။ ကိုဘုန်းမော်ပုံပါရှိသော နှစ်၂၀ပြည့် တံတားနီအထိမ်းအမှတ် ဓာတ်ပုံကို ကိုနစ်နေမန်း ဘလော့ဂ်ကနေ ရရှိပါတယ်။

s0wha1

Print this post

0 comments:

ကာရန်မဲ့ အတွေးစများ © 2008 Por *Templates para Você*